Fréttir

Ársfundur Starfsendurhæfingarsjóðs verður haldinn þriðjudaginn 12. apríl 2011 á Grand hótel Reykjavík.  Á ársfund eru sérstaklega boðaðir fulltrúar stofnaðila starfsendurhæfingarsjóðs auk stjórnar.  Dagskrá ársfundar er að finna hér. VIRK býður fagaðilum í starfsendurhæfingu hér á landi til ráðstefnunnar "Vinnum saman" miðvikudaginn 13. apríl 2011.  Ráðstefnan verður haldin á Grand hótel Reykjavík frá kl. 8:30 til 16:30 og er dagskrá hennar mjög fjölbreytt.  Auglýsing með dagskrá ráðstefnunnar er að finna hér.  Þátttakendur eru beðnir um að skrá sig hér til hægri á síðunni eða með því að smella hér.  Skráning þarf að eiga sér stað fyrir kl. 12:00 þriðjudaginn 12. apríl. 

Tveir nýir ráðgjafar hafa tekið til starfa hjá stéttarfélögum í samstarfi við VIRK. Kristbjörg Leifsdóttir hóf störf  hjá BHM, KÍ og SSF í mars og Arna Björk Árnadóttir hóf störf hjá Eflingu, Hlíf og Sjómannafélagi Íslands í dag. Kristbjörg er með aðsetur hjá BHM og Arna Björk hjá Eflingu. Kristbjörg er félagsráðgjafi, útskrifuð frá Háskóla Íslands 1997. Hún hefur fjölbreytta starfsreynslu og hefur m.a. starfað við  félagslega ráðgjöf, barnavernd og fjárhagsaðstoð. Undanfarin 14 ár starfaði  hún hjá Fjölskyldu- og félagsþjónustu Reykjanesbæjar.  Arna Björk Árnadóttir  lauk diplomanámi á meistarstigi í Náms- og starfsráðgjöf frá Háskóla Íslands  2010 og B.A. prófi frá Háskóla Íslands í Tómstunda- og félagsmálafræði 2009 .  Hún hefur fjölbreytta starfsreynslu, starfaði m.a. sem deildarstjóri félagsstarfs hjá þjónustumiðstöð Árbæjar og Grafarholts og nú síðast hjá Vinnumálastofnun við náms- og starfsráðgjöf.

Þórunn Margrét Ólafsdóttir, sjúkraliði á Landspítalanum, hefur  ekki bara verið lemstruð á líkamanum vegna slyss sem hún varð fyrir í fyrra, heldur einnig á sálinni, eins og hún orðar það.  ,,Það fór rosalega illa með sálartetrið í mér að detta úr vinnu og geta ekki staðið mína plikt. Ég vissi að aðrir yrðu þá bara að hlaupa hraðar á meðan ég væri frá og það var erfitt að hugsa til þess þar sem álagið á starfsfólk var mikið fyrir. Aðstoðin sem ég hef fengið hjá Starfsendurhæfingarsjóði til þess að vinna mig út úr þessu hefur hins vegar stappað í mig stálinu og verið ómetanleg.“

VIRK – Starfsendurhæfingarsjóður stendur fyrir ráðstefnu um starfsendurhæfingu miðvikudaginn 13. Apríl nk. á Grand hótel Reykjavík frá kl. 9:00 – 16:30.  Boðið verður upp á morgunverð áður en ráðstefnan hefst eða frá kl. 8:30 til 9:00.  Ráðstefnan er einkum ætluð fagfólki á sviði starfsendurhæfingar og er ráðstefnan og veitingar í boði VIRK. Dagskráin er fjölbreytt og er hana að finna hér.  Hægt er að skrá sig á ráðstefnuna hér eða með því að smella á auglýsinguna hér til hægri á síðunni.

Starfsendurhæfingarsjóður mun standa fyrir ráðstefnu miðvikudaginn 13. apríl næstkomandi fyrir fagfólk í starfsendurhæfingu.  Ráðstefnan verður haldin á Grand hótel Reykjavík.  Þar verða m.a. kynntar nýjar rannsóknir ásamt fjölbreyttum fyrirlestrum um áhugaverða aðferðarfræði og reynslu á þessu sviði. Dagskrá ráðstefnunnar verður send út í næstu viku. Takið daginn frá!

Hjá Starfsendurhæfingarsjóði hefur átt sér stað þróun á verkfærum og vinnuferlum sem hafa það að markmiði að meta getu og færni einstaklinga til að vera virkir þátttakendur á vinnumarkaði ásamt því að draga fram þau tækifæri sem eru til staðar og virkja og hvetja einstaklinga til dáða.  Hér er um að ræða svokallað starfhæfnismat.  Ýmsar rannsóknir og prófanir hafa nú þegar verið gerðar á matinu og stefnt er að því að halda þeim áfram í samstarfi við sérfræðinga bæði hérlendis og erlendis.    

Í nóvember sl. stóð Kennarasambandið fyrir fræðsluátaki undir nafninu „Velferð í vinnunni“ í samstarfi við ráðgjafa VIRK.  Haldnir voru 11 fundir víðsvegar um landið í nóvember sl. fyrir skólastjóra á öllum skólastigum.  Dagskráin var eftirfarandi: 1. Vinnuumhverfi – vinnuvernd – heilsuefling 2. Veikindaréttur 3. Réttindi í Sjúkrasjóði KÍ 4. VIRK - Úr veikindum í vinnu – fjarvistastjórnun

Mismunandi skilgreiningar hafa verið notaðar til að lýsa hugtakinu starfsendurhæfing og því ferli sem á sér stað í starfsendurhæfingu.  Sumir hafa ennfremur viljað gera greinarmun á starfsendurhæfingu annars vegar og atvinnutengdri endurhæfingu hins vegar þar sem atvinnutengd endurhæfing er talin hafa meiri skírskotun til starfs í atvinnulífinu á meðan starfsendurhæfing hefur það að markmiði að efla getu einstaklinga til að sjá um sig sjálfir óháð þátttöku á vinnumarkaði.  Þ.e. starf geti verið bæði launað starf og önnur verkefni daglegs lífs. 

Þriðjudaginn 8. febrúar sl. komu um 40 fulltrúar stofnaðila VIRK auk starfsmanna VIRK saman á Grand hótel Reykjavík til að ræða um og móta hugmyndir að leiðum til að efla starfsendurhæfingu á vinnumarkaði.  Fyrir hádegið var boðið upp á fyrirlestra bæði frá sérfræðingum VIRK og fulltrúum stéttarfélaga og atvinnurekenda og eftir hádegið var skipt upp í minni hópa þar sem ræddar voru hugmyndir um aðferðir til að efla starfsendurhæfingu á vinnumarkaði og uppbyggingu á þróunarverkefni í þessu samhengi til næstu 2-3 ára. Vinnustofan heppnaðist mjög vel og fram komu margar áhugaverðar hugmyndir sem unnið verður áfram  með bæði hjá starfsmönnum og stjórn VIRK. Hér má skoða myndir af þátttakendum vinnustofunnar:  Myndir frá vinnustofu um starfsendurhæfingu og forvarnir

Fyrir einu og hálfu ári gat ung móðir á Vestfjörðum ekki haldið á nýfæddu barni sínu án þess að finna fyrir miklum sársauka. Nú er unga móðirin á batavegi og á leið í nýja vinnu. Hún segir aðstoðina og hvatninguna frá Starfsendurhæfingarsjóði eiga stóran þátt í því. ,,Ég fór að finna fyrir miklum sársauka í hálsi í apríl 2009 þegar ég var heima í fæðingarorlofi með ungbarn á handleggnum. Verkurinn leiddi síðan niður í hægri öxl og handlegg. Ég greip til þess ráðs að sitja sem mest með barnið í fanginu og hafa það í poka framan á mér til þess að hlífa handleggnum,“ segir unga móðirin sem ekki vill koma fram undir nafni.  Hún segir álagið á hægri handlegg reyndar hafa verið mikið áður en hún fór að bera barnið á handleggnum. ,,Ég vann á skrifstofu og gerði allt með hægri hendi í vinnunni. Aðstaðan á vinnustað hefði einnig mátt vera betri.“