Fara í efni

Rannsóknir á vegum VIRK

Gagnreyndar rannsóknir eru mikilvæg forsenda þekkingarþróunar í þverfaglegri starfsendurhæfingu. Í lögum nr. 60/2012 um starfsendurhæfingarsjóði er VIRK heimilt að styrkja og stuðla að rannsóknum, þróun og uppbyggingu í atvinnutengdri starfsendurhæfingu á eigin vegum eða í samstarfi við aðra sérfræðinga.

Hornsteinn rannsókna á vegum VIRK er árangur einstaklinga og hópa í starfsendurhæfingu og hefur eftirfylgdarrannsókn VIRK verið burðarásinn í þeirri vinnu. Í eftirfylgd er gögnum um stöðu einstaklinga á vinnumarkaði og framfærslu safnað með reglubundnum hætti í allt að þrjú ár eftir að þjónustu lýkur.

Þátttaka í rannsókninni er algjörlega valkvæð og geta þátttakendur hætt í henni hvenær sem er. Til að tryggja persónuleynd er gögnum safnað í samstarfi við vottuð gagnaöflunarfyrirtæki og þeim síðan skilað til verkefnastjóra rannsókna og greininga hjá VIRK sem greinir þau og vinnur úr þeim.

Samkvæmt venju eru einungis þrjár spurningar í eftirfylgdarkönnuninni og er þátttaka því ekki tímafrek. Spurt er um meginstöðu einstaklings á vinnumarkaði (launþegi, í námi, annað) og í framhaldi af því er spurt um framfærslustöðu viðkomandi. Einnig gefst þátttakendum kostur á að svara opinni spurningu um stöðu sína og heilsufar, ef þeir kjósa.

Fyrirkomulag rannsóknarinnar er í samræmi við persónuverndarlög nr. 90/2018 og rannsóknarstefnu VIRK.

Hafa samband