Fréttir

Ársfundur Starfsendurhæfingarsjóðs verður haldinn í byrjun apríl 2011. Af því tilefni  gefur sjóðurinn út ársrit sem mun innihalda ársskýrslu og annan fróðleik um starfsemi Starfsendurhæfingarsjóðs. Einnig  er áætlað að hafa fræðilega umfjöllun um starfsendurhæfingu í  ritinu. VIRK býður því áhugasömum aðilum  sem hafa áhuga og þekkingu á málaflokknum og vilja fjalla um starfsendurhæfingu á  fræðilegum nótum að senda inn greinar til birtingar. Sérstaklega er óskað eftir greinum um starfsendurhæfingu með áherslu á vinnutengingu og/eða gagnverkandi áhrif vinnu og heilsu.                       

Nýr sérfræðingur hefur tekið til starfa hjá VIRK en það er Sveina Berglind Jónsdóttir sálfræðingur. Sveina Berglind er með MSc gráðu í vinnusálfræði frá University of Westminster í London og  framhaldsnám í klínískri sálfræði frá  Háskóla Íslands (starfsnám á Reykjalundi).  Hún starfaði sem sviðsstjóri á Fræðslu- og þróunarsviði hjá Svæðisskrifstofu málefna fatlaðra á Reykjanesi síðastliðin sjö ár.  Meðal verkefna þar voru umsjón með fræðslu starfsmanna, gæðamálum, rannsóknum og þróunarverkefnum.  Auk þess sá hún um ráðgjöf við stjórnendur og klíníska vinnu. Hún hefur einnig unnið verkefni sjálfstætt, s.s.:  eineltismál á vinnustöðum, námskeið, vinnustaðagreiningar og sálfræðiráðgjöf.

Hjá Starfsendurhæfingarsjóði (VIRK) hefur átt sér stað þróun á verkfærum og vinnuferlum sem hafa það að markmiði að meta getu og færni einstaklinga til að vera virkir þátttakendur á vinnumarkaði ásamt því að draga fram þau tækifæri sem eru til staðar og virkja og hvetja einstaklinga til dáða.  Hér er um að ræða svokallað starfshæfnismat.  Einn hluti starfshæfnismats er svokallað sérhæft mat þar sem fleiri sérfræðingar koma að  matinu með ítarlegri skoðun og greiningu.  Ástæður fyrir sérhæfðu mati geta verið margvíslegar en það er ráðgjafi í starfsendurhæfingu sem starfar í tengslum við VIRK sem vísar í sérhæft mat á grundvelli niðurstöðu grunnmatsins í samráði við sérfræðing hjá VIRK.

,,Þegar ég var yngri sá ég engan tilgang með því að greiða stéttarfélagsgjöld. Nú er ég glaður í hjarta vegna allrar aðstoðarinnar frá stéttarfélaginu mínu og Starfsendurhæfingarsjóði í kjölfar slyssins sem ég lenti í. Nú skil ég mikilvægi þess að hafa gott stéttarfélag á bak við sig. Ráðgjafinn á vegum Starfsendurhæfingarsjóðs hefur jafnframt reynst mér afar vel.“ Þetta segir Friðrik Ottó Ragnarsson járnsmiður sem fyrir um tveimur árum, eða í byrjun nóvember 2008, slasaðist á hrygg og hálsi í bílveltu. ,,Ég var lánaður í annað fyrirtæki og var uppi á Nesjavöllum á leið í vinnuna. Það var hálka á veginum og bíllinn snerist í þrjá hringi áður en hann fór út í kant og valt. Ég gat skriðið út um gluggann þar sem rúðan hafði brotnað. Bóndi sem sá þegar slysið varð hringdi á sjúkrabíl. Mér fannst ég vera að kafna og reyndi að liggja þannig á jörðinni að ég fyndi sem minnst til,“ greinir Friðrik frá. Járnsmíðina varð hann að gefa upp á bátinn vegna stöðugra verkja, einkum í hálsinum. ,,Ég er að verða 57 ára og hef alltaf unnið við járnsmíði sem er erfiðisvinna. Ég hef alltaf verið hraustur og unnið 150 prósenta vinnu og vel það og svo lendi í þessu.“

Samvinna mannauðsstjóra Mosfellsbæjar, Starfsendurhæfingarsjóðs og sjúkraþjálfara varð til þess að Matthías M. Guðmundsson gat hætt í veikindaleyfi og hafið aftur störf mörgum mánuðum fyrr en hann átti von á. Það var í janúar síðastliðnum sem Matthías, sem er 65 ára, varð að hætta störfum í íþróttamiðstöð Mosfellsbæjar vegna mikilla verkja í baki. ,,Ég hef verið bakveikur í mörg ár og annað slagið fengið sprautur og verið í sjúkraþjálfun. Það hefur alltaf dugað í einhvern tíma. Ég gat haldið 100 prósenta vinnu þar til í janúar á þessu ári en þá var ég kominn með það mikla verki að ég var gjörsamlega óvinnufær vegna kvala,“ greinir Matthías frá.

Það er mikilvægt að bæði stjórnendur og starfsmenn séu vel upplýstir um mikilvægi góðrar fjarvistarstjórnunar og starfsendurhæfingar á vinnustöðum.  Starfsendurhæfingarsjóður hefur útbúið fjölbreytt fræðsluefni fyrir stjórnendur og starfsmenn vegna þessa.  Má þar meðal annars benda á eftirfarandi: Ábendingar um mikilvæga þætti í mótun fjarvistarstefnu Tíu ráð til að draga úr fjarvistum á vinnustað Fræðsluefnið "Vinnum saman" inniheldur m.a. leiðbeiningar til stjórnenda varðandi farsæla endurkomu til vinnu eftir veikindi eða slys Fræðsluefnið "Úr veikindum í vinnu" inniheldur m.a. leiðbeiningar til einstaklinga með skerta starfsgetu Fjarvistarsamtalið inniheldur leiðbeiningar til stjórnenda og starfsmanna þar sem markmiðið er að finna farsælar leiðir til að standa vörð um vinnugetu starfsmanna Greinin "Fjarvistarstjórnun" eftir Ingibjörgu Þórhallsdóttur sérfræðing hjá VIRK inniheldur ýmsar upplýsingar sem gagnast við mótun og framfylgni fjarvistarstefnu á vinnustað Ofangreind fræðsluefni er m.a. að finna á síðunni "Fræðsla fyrir stjórnendur" sem er listuð upp í gráa kassanum til vinstri á heimasíðu VIRK.

Nýlega voru tveir nýjir ráðagjafar ráðnir til starfa fyrir stéttarfélög í samstarfi við VIRK: Ólafur K. Júlíusson hefur verið ráðinn ráðgjafi hjá Eflingu stéttarfélagi. Ólafur er með MSc gráðu í vinnusálfræði frá Háskólanum  í Sheffield, en þar er lögð áhersla á kennslu hagnýtra og gagnreyndra aðferða ásamt rannsóknarmiðuðum verkefnum. Hann hefur fjölbreytta starfsreynslu og hefur m.a. starfað með einstaklingum í AMS (Atvinna með stuðningi) og unnið verkefni með Lögregluskóla ríkisins og Ríkislögreglustjóra tengd streitu, kvíða, þunglyndi og lífshamingju og starfsmannavali. Inga Margrét Skúladóttir hefur verið ráðin ráðgjafi fyrir stéttarfélög á Suðurlandi. Inga Margrét  er með starfsréttindi í félagsráðgjöf frá H.Í. og hefur mikla starfsreynslu. Hún starfaði við félagsþjónustu á Selfossi og Kópavogi um árabil og hefur undanfarin ár starfað hjá Skólaskrifstofu Suðurlands.

,,Það var ekki fyrr en ég hitti Karen ráðgjafa sem ég fékk svör við öllum mínum spurningum um hvað tæki við þegar ég færi af launum vegna veikinda. Ég var búin að fara víða en mér fannst ég hvergi fá nógu greinargóð svör. Ég var alveg ráðþrota og auk þess full af áhyggjum yfir því að fá kannski ekki aftur vinnu. Karen leiddi mig í gegnum þetta allt og ég fylltist sjálfstrausti á ný. Ég fann betur fyrir því að ég væri einhvers virði og að allt væri ekki búið,“ segir Sólveig Sigurjónsdóttir. Sólveig, sem er 65 ára, er nú komin til starfa á ný eftir eins og hálfs árs veikindaleyfi. Veikindin höfðu reyndar hrjáð hana löngu áður en hún hætti að vinna.  Með aðstoð ráðgjafa í starfsendurhæfingu tókst henni að endurheimta trú á getu sína og nú er hún komin í vinnu á ný.  Viðtalið við Sólveigu í heild sinni er að finna hér og til vinstri hér á síðunni er að finna fleiri viðtöl við einstaklinga sem hafa náð árangri með aðstoð ráðgjafa í starfsendurhæfingu - sjá einnig hér.

Mikilvægt er að sameiginlegur skilningur liggi að baki þeim hugtökum sem notuð eru í því starfshæfnismati sem Starfsendurhæfingarsjóður leggur til grundvallar. Markmiðið með vinnu rýnihópsins er því að skýra betur þau lykilhugtök sem liggja þar að baki þannig að merking þeirra verði nákvæmari og tryggi sameiginlega sýn.

Stjórn Starfsendurhæfingarsjóðs hefur samþykkt reglur um styrki til þróunar- og uppbyggingarverkefna í starfsendurhæfingu.  Markmiðið er að stuðla að aukinni fjölbreytni og framboði úrræða í starfsendurhæfingu á Íslandi og þróun þeirra.  Sérstök áhersla er lögð á að styrkja verkefni sem styðja við markmið og verkefni Starfsendurhæfingarsjóðs og stuðla að eflingu og fjölbreytni atvinnutengdra úrræða.