Atvinnutenging 2024
Atvinnutenging einstaklinga sem luku þjónustu hjá atvinnulífstenglum VIRK árið 2024
Þjónustuþegum VIRK sem geta nýtt sér aukna aðstoð við að komast inn á vinnumarkaðinn stendur til boða að fá sérstaka aðstoð frá atvinnulífstenglum VIRK. Margir þessara einstaklinga eru með skerta starfsgetu og stefna á hlutastörf við lok starfsendurhæfingar. Hinsvegar fara einnig margir þeirra í fullt starf við lok þjónustu - 42% árið 2024 - eins og sjá má á myndinni „Hlutfallsleg skipting starfa eftir starfshlutfalli“ hér fyrir neðan.
Árið 2024 bárust 434 tilvísanir til atvinnulífstengla en 424 einstaklingar luku þjónustu hjá þeim. Við lok þjónustu voru um 60% þeirra með vinnugetu og virkir á vinnumarkaði, þ.e. fóru í vinnu, nám eða atvinnuleit.
Atvinnulífstenglar VIRK nýta sér ýmis úrræði til að auka líkur á endurkomu til vinnu og eru vinnuprófanir eitt slíkt úrræði. Vinnuprófanir geta gefið góða mynd af vinnugetu einstaklingsins og er gott að nota þegar óvissa er um hana. Árið 2024 voru 30 vinnuprófanir settar af stað og af þeim urðu 13% að áframhaldandi störfum í framhaldinu.
Vinnusamningar eru einnig úrræði sem atvinnulífstenglar nýta sér til að auðvelda endurkomu inn á vinnumarkaðinn en árið 2024 voru 29 slíkir samningar gerðir og urðu 48% þeirra að áframhaldandi störfum.
Atvinnulífstenglar VIRK leggja mikla áherslu á samstarf við fyrirtæki enda er gott samstarf og samvinna grundvöllur farsællar atvinnutengingar. Nú eru yfir 1600 fyrirtæki og stofnanir skráðar í upplýsingagrunn VIRK og mörg þeirra eru með ákveðna tengiliði sem auðveldar allt samstarf.
Árið 2023 var í fyrsta sinn veitt viðurkenning til fyrirtækja og stofnana sem eru í samstarfi við atvinnutengingu VIRK og sinntu þessu samstarfi sérlega vel og sýndu samfélagslega ábyrgð - og eru þannig hvetjandi fyrir önnur fyrirtæki til góðra verka. Að þessu sinni voru 11 fyrirtæki og stofnanir tilnefnd og Rafver og Hrafnista hlutu viðurkenninguna VIRKT fyrirtæki 2025, Hrafnista annað árið í röð.
Á myndunum hér fyrir neðan má sjá áhugaverðar upplýsingar sem tengjast þjónustuþegum VIRK sem luku þjónustu hjá atvinnulífstenglum árið 2024.
