Fréttir

Í byrjun árs 2012 störfuðu á skrifstofu VIRK 16 starfsmenn í ríflega 13 stöðugildum.  Um er að ræða fjölbreyttan hóp sérfræðinga á mismunandi fagsviðum auk starfsmanna á skrifstofu og við bókhald og umsýslu fjármála.  Hér á heimasíðunni má sjá upplýsingar um starfsmenn VIRK. Í byrjun ársins 2012 störfuðu 34 ráðgjafar í um 29 stöðugildum á vegum VIRK fyrir stéttarfélög um allt land.  Lista yfir alla ráðgjafa VIRK er að finna hér.  Í heild starfa því um 50 einstaklingar á vegum VIRK annað hvort sem starfsmenn eða ráðgjafar hjá stéttarfélögum um allt land.  Umfangið hefur því vaxið mikið og kallað á breytta skipulagningu á ábyrgðarsviðum og verkefnum starfsmanna.  

Tæplega 1500 starfsmenn sem taka þátt í verkefninu Virkur vinnustaður, sem er þróunarverkefni á vegum VIRK, voru spurðir  haustið 2011 um hversu lengi og hversu oft þeir voru fjarverandi frá vinnu á síðastliðnum 12 mánuðum vegna eigin veikinda. Þessar spurningar voru liður í spurningakönnun um vinnuumhverfið, líðan, starfsánægju og stjórnun á vinnustöðum.  Í ljós kom að starfsmenn töldu sig hafa verið frá vinnu vegna eigin veikinda að meðaltali í 8,7 daga á síðastliðnum 12 mánuðum og að þeir hefðu verið í 3,1 skipti fjarverandi á þessum tíma.  Þetta eru ákveðnar vísbendingar um viðmið fyrir veikindafjarveru en mikilvægt er að skoða fjarvistatölur í samhengi við menningu vinnustaðar og stjórnunarhætti. 

Sjúkraþjálfarar gegna mjög veigamiklu hlutverki í starfsendurhæfingu einstaklinga með stoðkerfisvandamál. Í maí 2011 var samið við Félag sjálfstætt starfandi sjúkraþjálfara um reglur varðandi samvinnu sjúkraþjálfara og ráðgjafa VIRK og gjaldskrá vegna samskipta og umbeðinna greinargerða. Til að fylgja því samstarfi eftir hélt VIRK fund með sjúkraþjálfurum 7.febrúar s.l. Á fundinn  voru boðaðir sjúkraþjálfarar frá stærri sjúkraþjálfunarstöðvum á höfuðborgarsvæðinu, sem verið hafa í samstarfi við VIRK og hafa reynslu af því samstarfi. Alls mættu 10 sjúkraþjálfarar á fundinn, þ.m.t. fulltrúi frá Félagi íslenskra sjúkraþjálfara og fulltrúi frá Félagi sjálfstætt starfandi sjúkraþjálfara.

Ráðgjafi VIRK, á Suðurlandi setti sig í samband við rúmlega fertugan karlmann fyrir tveimur árum sem hafði átt við langvarandi og erfið veikindi að glíma. Þetta símtal varð til þess að breyta lífi þessa einstaklings sem glímt hefur við geðhvarfasýki frá barnsaldri.

Í verkefninu Virkur vinnustaður er lögð áhersla á jákvæða og heilsusamlega nálgun varðandi mótun Stefnu um velferð, fjarvistir og endurkomu til vinnu. Í verkefnavinnu þegar fólk er spurt hvað vellíðan á vinnustað þýði fyrir það og hvað geri vinnustaðinn skemmtilegan eru fyrstu svörin oft: „Vinnufélagarnir“, „gleði“, „hlátur“, „góður starfsandi“ og  „jákvæðni“ áður en það nefnir viðfangsefnin og annað sem lýtur beint að starfinu.

Mánaðarlega eru haldnir fræðsludagar fyrir ráðgjafa VIRK í starfsendurhæfingu.  Í janúar kom fagfólk frá geðsviði Reykjalundar til okkar og hélt námskeiðið „hjálp til sjálfshjálpar“.  Á námskeiðinu var kynnt handbók um hugræna atferlismeðferð,  notkun hennar við þunglyndi og kvíða, virkni og hreyfing, hugsanir og líðan, hugsanaskrá og bakslagsvarnir.  Handbókin er aðgengileg almenningi á veraldarvefnum og getur nýst mörgum sem sjálfshjálparefni við þunglyndi og kvíða.  Handbókin kemur sér sérstaklega vel á landssvæðum þar sem aðgengi að fagfólki er takmarkað.  Ráðgjafar VIRK geta nú stutt betur við þá einstaklinga sem nýta sér þetta efni.

Nýir ráðgjafar hafa tekið til starfa hjá stéttarfélögum í samstarfi við VIRK. Þetta eru Helga Bryndís Kristjánsdóttir og Harpa Þórðardóttir sem hafa hafið störf hjá Eflingu, Hlíf og Sjómannafélagi Íslands, með aðsetur hjá Eflingu, Hulda Gunnarsdóttir, Sif Þórsdóttir og Hildur Petra Friðriksdóttir sem starfa hjá VR og Bjarki Þór Baldvinsson sem hefur hafið störf hjá stéttarfélögum á Akureyri og á Eyjafjarðarsvæði, með aðsetur hjá Einingu - Iðju á Akureyri.

Ráðgjafafyrirtækið Talnakönnun hefur tekið saman fyrir VIRK nokkur einföld dæmi um fjárhagslegan ávinning þess þegar starfsendurhæfing skilar þeim árangri að einstaklingur tekur fullan þátt á vinnumarkaði í stað þess að fara á örorkulífeyri.  Útreikningar miðuðust við mismunandi forsendur um aldur, launagreiðslur og tímabil starfsendurhæfingar. Reiknað var hver heildarlaun einstaklings yrðu til 67 ára aldurs.  Tekið var saman hvað lífeyrissjóður og Tryggingastofnun myndu greiða og hvert tap einstaklingsins yrði - en tap einstaklingsins miðast við þann hluta vinnulauna sem hann fær ekki bættan frá öðrum.

Valtýr Örn Gunnlaugsson varð að hætta að vinna í janúar 2010 vegna slæmra verkja í líkamanum. Hann var þjáður af liðagigt með tilheyrandi bólgum og sársauka. Valtýr Örn fékk lítinn skilning á aðstæðum sínum og það var ekki fyrr en hann fékk viðtal hjá ráðgjafa Starfsendurhæfingarsjóðs sem líf hans snerist til betri vegar.