Tinna Sigurbjörg Hallgríms atvinnulífstengill hjá VIRK

Tinna Sigurbjörg er atvinnulífstengill hjá VIRK á Suðurnesjum. Aðsetur hennar er í Heilsugæslunni Höfða í Reykjanesbæ sem er útibú frá Höfða í Reykjavík.

„Ég hóf að vinna hjá VIRK í fullu starfi haustið 2023,“ segir Tinna Sigurbjörg. „Ég byrjaði ung að vinna í félagsmiðstöð í Vogum á Vatnsleysuströnd og starfaði þar í tólf ár. Ég er menntaður tómstunda- og félagsmálafræðingur frá Háskóla Íslands. Áður en ég hóf störf hjá VIRK var ég ráðgjafi hjá Vinnumálastofnun og fór svo yfir í fyrirtækjaráðgjöf þar. Þessi reynsla mín hefur komið sér vel því ég var þar með komin í góð tengsl við fyrirtækin hér á Suðurnesjum.“

Það er mikil þörf á að hafa brú á milli atvinnurekenda og þeirra sem eru í þörf fyrir vinnu. 

Er mikil þörf fyrir atvinnulífstengil hjá VIRK á þessu svæði?
„Já það er mikil þörf á að hafa brú á milli atvinnurekenda og þeirra sem eru í þörf fyrir vinnu. Það er mjög algengt að einstaklingur sem búinn er að vera lengi frá vinnumarkaði sé búinn að missa dálítið sjálfstraustið gagnvart atvinnumarkaðinum.

Það er mikilvægt að geta veitt aðstoð í slíkum tilvikum, svo sem að hjálpa fólki að gera ferilskrá, finna vinnu og ekki síst að kortleggja hvaða möguleikar séu fyrir hendi því oft getur fólk ekki snúið aftur á fyrri vinnustað og þarf að finna eitthvað allt annað til að starfa við.“

Vissulega geta verið allskonar hindranir

Hvernig gengur að fá fyrirtæki til að ráða fólk í vinnu sem kemur úr þjónustu VIRK?
„Allir atvinnurekendur sem ég hef haft samskipti við hafa tekið mér vel, hvort sem ég hef talað við þá í síma eða farið á vettvang. En vissulega geta verið allskonar hindranir. Það getur reynst krefjandi að koma þjónustuþegum aftur út á vinnumarkaðinn. Hér er margt fólk af erlendum uppruna sem ekki talar íslensku og varla ensku. Svo er talsvert atvinnuleysi á Suðurnesjum núna eins og komið hefur fram í fréttum undanfarið.

Fólk sem ekki talar íslensku og varla ensku fær helst vinnu til dæmis á lager í stórverslunum, svo sem Bónus, Byko og Húsasmiðjunni svo dæmi séu tekin.“

Hefur þú orðið vör við fordóma atvinnurekenda gagnvart þeim sem hafa nýtt sér þjónustu hjá VIRK?
„Nei, það hef ég ekki fundið persónulega. Hins vegar er mjög oft krafa um að fólk tali íslensku en það er ekki vegna fordóma heldur þarf þá starfsmaðurinn að geta tjáð sig. Því er þó ekki að neita að stundum spyrja þeir, sem hafa verið í þjónustu hjá VIRK, hvort þeir eigi að segja frá því eða ekki í atvinnuviðtölum. Ég hef alltaf sagt þjónustuþegum að þeir ráði auðvitað hvað þeir segi en reynsla sýni að best sé að vera hreinskilinn í samskiptum.“

Framboð á hlutastörfum er að aukast

Er erfitt að fá hlutastörf?
„Framboð á hlutastörfum er takmarkað á Suðurnesjum og þannig er það víðar um landið. Hins vegar eru þeir sem leita til mín einmitt oft að reyna að komast í hlutastörf, treysta sér ekki í meiri vinnu í fyrstu. Við sem störfum sem atvinnulífstenglar erum mjög mikið að tala fyrir því að fyrirtæki auki framboð á hlutastörfum og þau hafa reyndar farið vaxandi.

Það mætti nefna mörg fleiri fyrirtæki á svæðinu sem hafa sýnt áhuga á að styðja þjónustuþega frá VIRK, sem sagt; sýnt í verki samfélagslega ábyrgð.

Flugstöð Leifs Eiríkssonar á Keflavíkurflugvelli býður upp á talsvert af hlutastörfum af ýmsu tagi en slík störf eru yfirleitt vaktavinna sem ekki öllum hentar. Þetta á við um Íslendinga og líka þá útlendinga sem eru talandi til dæmis á ensku og jafnvel fleiri tungumálum.“

Sinnir mun fleiri konum en körlum

Hvort eru fleiri karlar eða konur í hópi þeirra sem VIRK þjónustar á þessu svæði?
„Ég er með mun fleiri konur en karla í mínum hópi. Ég hugsa að um áttatíu prósent þjónustuþega minna frá VIRK séu konur. Um er reyndar að ræða fólki á öllum aldri, allt frá tvítugu og upp í sjötugsaldur. Um þrjátíu prósent þeirra sem ég þjónusta eru útlendingar.“

Hafa orðið miklar breytingar í starfi þínu hjá VIRK undanfarin ár?
„Helstu breytingarnar eru þær að það eru að koma inn þyngri mál, fleiri koma inn í þjónustu sem tala ekki íslensku eða ensku. Þetta gerir allt erfiðara, líka að veita viðeigandi þjónustu.“

Hvernig taka ráðgjafar á því þegar fólk talar litla íslensku?
„Inntökuteymi VIRK fer yfir allar umsóknir. Við atvinnulífstenglar stjórnum ekki hverjir koma í þjónustu til okkar. Við nýtum okkur gjarnan túlka þegar við erum til dæmis að hjálpa fólki að gera ferilskrá og það hefur komið fyrir að ég hef fengið túlkun símleiðis þegar ég hef fylgt þjónustuþega í starfsviðtal.

En þótt erfitt sé eru samt sem áður alltaf einhverjir möguleikar, svo sem þegar koma sumarfrí og vantar fólk í afleysingar og líka sem fyrr sagði eru lagerstörf heppileg meðan fólk er að læra málið. Þeir útlendingar sem koma í þjónustu hjá VIRK fara yfirleitt í íslenskunám og margir geta bjargað sér eitthvað.“

Auðveldara að finna störf fyrir Íslendinga

Er auðveldara að koma Íslendingum í störf á Suðurnesjum?
„Já, vissulega er það mun auðveldara. Reykjanesbær hefur verið mjög hliðhollur þjónustuþegum frá VIRK, oft vantar þar fólk í umönnun, í skólastörf og þannig mætti telja. Dýralækningastofa Suðurnesja hefur líka sýnt okkur samstarfsvilja, tekið fólk í vinnuprófun til að meta starfsgetu þess og stundum ráðið viðkomandi í áframhaldandi starf að því loknu. Það mætti nefna mörg fleiri fyrirtæki á svæðinu sem hafa sýnt áhuga á að styðja þjónustuþega frá VIRK, sem sagt; sýnt í verki samfélagslega ábyrgð.“

Nýlega útskrifaði ég einstakling sem fór í vinnu en viðkomandi hafði ekki unnið í fimm ár. Það var óneitanlega gleðilegt. 

Eru margir atvinnulífstenglar VIRK starfandi á Suðurnesjum?
„Sem stendur er ég eini atvinnulífstengillinn hér á Suðurnesjum en ég hef heyrt því fleygt að það kunni að bætast annar við bráðum,“ segir Tinna Sigurbjörg létt í máli.

Mikilvægt að fólk finni ánægju í starfi

Hefur starfsánægja mikið vægi hjá þeim sem koma úr þjónustu VIRK?
„Þjónustuþegar VIRK taka ekki endilega hvaða vinnu sem er. Það hafa sumir þeirra lent í slysum, einelti, eða kulnun og í slíkum tilvikum þá vill fólk ekki starfa við viðlíka aðstæður og áður. Það rífur kannski upp leiðar minningar. Almennt er mikilvægt að fólk finni starf þar sem því líður vel og sinnir áhugaverðum verkefnum.

Það er fátt betra en að sjá einstakling sem er að ljúka þjónustu hjá VIRK snúa aftur út á vinnumarkaðinn vonglaðan og fullan af nýfengnu sjálfstrausti.

Nýlega útskrifaði ég einstakling sem fór í vinnu en viðkomandi hafði ekki unnið í fimm ár. Það var óneitanlega gleðilegt. Það hefur sýnt sig að því lengra sem líður því erfiðara er fyrir fólk að komast aftur út á vinnumarkaðinn.

Ég vil bæta því við í þessu sambandi að sjálf hef ég haft ómælda ánægju af mínu starfi sem atvinnulífstengill VIRK, það er fátt betra en að sjá einstakling sem er að ljúka þjónustu hjá VIRK snúa aftur út á vinnumarkaðinn vonglaðan og fullan af nýfengnu sjálfstrausti.“

Texti: Guðrún Guðlaugsdóttir
Mynd: Lárus Karl Ingason

Viðtalið birtist í ársriti VIRK 2026