Fara í efni

Virkniúrræði

Safn virkniúrræða sem styðja við, auka virkni og árangur í starfsendurhæfingu.

Bataskólinn er ætlaður fólki, 18 ára og eldra, sem glímt hefur við geðrænar áskoranir í lífi sínu og er markmið skólans að veita fræðslu um geðraskanir, gefa góð ráð varðandi geðheilsu, bæta lífsgæði nemenda og auka virkni.

Skólinn er öllum opinn og nemendum að kostnaðarlausu.

Ásheimar er samastaður fólks sem vill rækta sinn innri mann í góðum félagsskap. Opnunartími: 13 – 16 alla virka daga.

Í Ásheimum er stefnt að því markmiði að vinna gegn félagslegri einangrun og skapa aðstæður fyrir fólk til að byggja sig upp andlega. 

Starfsemi Krafts felst í því að veita andlegan og félagslegan stuðning við þá sem greinast með krabbamein og aðstandendur þess, að gæta hagsmuna félagsmanna og standa vörð um réttindi þeirra gagnvart opinberum aðilum.

Kraftur heldur úti öflugu stuðningsneti þar sem áhersla er lögð á jafningjastuðning byggðan á persónulegri reynslu. 

Ljósið er endurhæfingar- og stuðningsmiðstöð fyrir fólk sem hefur fengið krabbamein og aðstandendur þeirra.

Hjá Geðhjálp er starfandi fagmenntaður ráðgjafi sem ætlað er að veita  þjónustu við fólk með geðraskanir og aðstandendur þeirra án endurgjalds. Ráðgjöfin getur farið fram með viðtali, símtali og tölvupósti. Henni er ætlað að vera leiðbeinandi en er ekki hugsuð sem meðferð eða vera meðferðarígildi.

Þá hýsa samtökin starfsemi sjálfshjálparhópa í aðsetri sínu við Borgartún; kvíðahóp, geðhvarfahóp og sjálfshjálparhóp Pólverja.

 

Endurhæfingarhúsið Hver er ætlað fyrir öryrkja og einstaklinga sem hafa misst vinnu vegna veikinda, slysa eða áfalla. 

Í Hinu húsinu er deild sérstaklega helguð atvinnumálum ungs fólks. Markmið atvinnudeildarinnar er að styrkja stöðu ungs fólks á aldrinum 16-25 ára á vinnumarkaði. Þar er hægt að fá markvissa ráðgjöf í atvinnuleit og öllu sem henni tengist. 

Verkefni á vegum Sveitarfélagsins Árborgar.

Auðlindin er virkni- og atvinnutengd fjölsmiðja fyrir ungt fólk í Árborg sem lent hefur utan vinnumarkaðar og þarfnast þjálfunar fyrir almennan vinnumarkað. 

Ekkert vandamál er of stórt eða lítið fyrir Hjálparsímann 1717 og netspjall Rauða krossins en árlega berast um 15 þúsund mál inn á borð 1717 sem eru jafn ólík og þau eru mörg. 

Hægt er að hafa samband vegna alls þess sem þér liggur á hjarta og fá sálrænan stuðning, ráðgjöf, hlustun og upplýsingar um þau úrræði sem í boði eru í íslensku samfélagi.

Fyrir ungt fólk á forsendum ungs fólks. Bergið er stuðnings- og ráðgjafasetur fyrir ungt fólk upp að 25 ára aldri. Þjónustan kostar ekkert. 

Samstarfsverkefni Félags áhugafólks um tölvu- og netfíkn, Hugarafls, Hins hússins, Janusar endurhæfingar og Rauða krossins á Íslandi. Úrræðið er ekki farið af stað en ábyrgðaraðilar eru að vinna í því að koma því af stað. 

Markmið félagsins er að styðja syrgjendur og þá sem vinna að velferð þeirra.

Starfsemin felst í stuðningi við þá sem eiga um sárt að binda vegna ástvinamissis ásamt almennri fræðslu og fyrirlestrum um sorg og sorgarviðbrögð.

Vesturafl er geðræktarmiðstöð þar sem boðið er upp á virkni og samveru. Hlutverk hennar er fyrst og fremst að rjúfa félagslega einangrun og hvetja notendur til þátttöku í samfélaginu.

Aukin áhersla hefur verið lögð á ungt fólk (16-30 ára) og þeim boðið upp á þjónustu sem hefur ekki verið til staðar áður þ.m.t. heimanámsaðstoð, verkefni í vinnustofu og að aðstoða við matseld. 

Virkniúrræðið Vin er athvarf fyrir fólk með geðraskanir, rekið af Rauða krossinum í Reykjavík sem fræðslu- og batasetur ásamt velferðarsviði Reykjavíkurborgar.

Markmiðið er að rjúfa félagslega einangrun, draga úr endurinnlögnum á geðdeildir og efla þekkingu á málefnum fólks með geðfötlun.

Gestir koma í athvarfið á eigin forsendum eða með stuðningi annarra og njóta þeirrar þjónustu sem í boði er.

Áhersla er lögð á að efla sjálfstæði og virkni gestanna, en jafnhliða eru gestir aðstoðaðir við að leita nýrra leiða, sé þess óskað. 

Kvennaráðgjöfin er ókeypis lögfræði- og félagsráðgjöf fyrir konur.

Geðveikur fótbolti er samstarfsverkefni Hlutverkaseturs, velferðarsviðs Reykjavíkur og geðsviðs Landspítalans. Markmið er að auka virkni fólks með geðraskanir og gefa því tækifæri til að iðka knattspyrnu.

Hertex hefur undanfarin ár veitt fjölda sjálfboðaliða, sem hafa af einhverjum ástæðum ekki getað verið á vinnumarkaði,  tækifæri til að koma og vinna hjá þeim allt frá nokkrum tímum á viku til nokkurra tíma á dag.

Sjálfboðaliðunum er einnig boðið upp á sjálfstyrkingarnámskeið þar sem unnið er með persónulega uppbyggingu, fjármálanámskeið, matreiðslunámskeið og fjallað um hollustu og hreyfingu.

Handverks- og tómstundamiðstöðin Punkturinn á Akureyri hefur byggst upp á fjórum grunnþáttum sem eru vefnaður, smíðar, saumaskapur og leirmótun.

Auk þess hafa verið haldin mörg námskeið í ýmsum list- og handverksgreinum. Það er stefna staðarins að sköpunargleðin sitji í fyrirrúmi.

Lýðheilsusetrið Ljósbrot hefur um allt langt skeið unnið og þróað með sér hugmyndafræðí sem hentar ungu fólki frá 18 ára aldri, undanfarin 5 ár hefur hugmyndafræðin verið nýtt til þróunar á Pepp Upp verkefninu sem VIRK hefur styrkt.

Virkniúrræði sem er öllum opið. Markmiðið með verkefninu var að bjóða upp á þjónustu fyrir einstaklinga utan vinnumarkaðar og vinna textíl á umhverfisvænan hátt með efnivið sem til fellur við framleiðslu á Íslandi.

Fjölmennt er símenntunar- og þekkingarmiðstöð sem skipuleggur námskeið fyrir fólk með þroskahömlun, fólk á einhverfurófi og fólk með geðfötlun, frá 20 ára aldri. 

Tækifæri er valdeflandi verkefni fyrir ungt fólk þar sem það fær tækifæri til þess að velja sér verkefni og viðfangsefni og vaxa og þroskast sem einstaklingar.

Verkefnið er fyrir unga einstaklinga sem eru án vinnu og ekki í námi og vilja styrkja sig sem einstaklingar.

Bjarkarhlíð er miðstöð fyrir þolendur ofbeldis.

Markmið Bjarkarhlíðar er að veita stuðning og ráðgjöf ásamt fræðslu og umfjöllun um eðli og afleiðingar ofbeldis, auk þess að gefa skýr skilaboð um að ofbeldi verði ekki liðið. 

Björgin Geðræktarmiðstöð Suðurnesja er grunnendurhæfingarúrræði og athvarf fyrir fólk með geðheilsuvanda.

Þjónusta miðar að því að bæta þjónustu í heimabyggð við einstaklinga sem glíma við geðrænan vanda og til að rjúfa félagslega einangrun.

Hlutverkasetur er virknimiðstöð og er öllum opinn og taka einstaklingar þátt á eigin forsendum.

Boðið er upp á umgjörð, hvatningu og stuðning fyrir þá sem vilja viðhalda virkni á markvissan hátt eða auka lífsgæðin.

Karlar í skúrum er opið fyrir alla karlmenn og gefur þeim stað og stund til að hittast, spjalla og vinna að ýmsum sameiginlegum verkefnum sem þeir sjálfir ákveða.

Virkniúrræðið er á þremur stöðum á landinu, Helluhrauni 8 í Hafnarfirði, Arnarbakka 2 í Breiðholti og Vesturbyggð á Patreksfirði.

Hugrún er félag stofnað af hópi háskólanema í hjúkrunarfræði, læknisfræði og sálfræði, sem hefur það að markmiði að auka þekkingu ungs fólks á geðheilsu.

Á heimasíðu þeirra, www.gedfraedsla.is, má nálgast gagnlega fræðslu um geð- og lyndisraskanir á mannlegu máli. Félagið sinnir einnig fræðsluerindum í háskólum og menntaskólum landsins.

Specialisterne á Íslandi hafa unnið í fimm ár með einstaklingum á einhverfurófinu. Hjá Specialisterne eru einstaklingarnir metnir og þjálfaðir, þeim hjálpað að komast í „réttan takt“ við hið daglega líf.

Markmiðið er að finna launað starf sem passar hverjum og einum eins fljótt og kostur er. 

Vesen og vergangur er opinn gönguhópur sem skipuleggur skemmtilegar og fjölbreyttar gönguferðir á suðvesturhorninu allt árið og víðar á landinu á sumrin.

Lækur er athvarf í Hafnarfirði fyrir einstaklinga með geðrænan vanda. 

Markmið starfsins í Læk er að draga úr félagslegri einangrun og styrkja andlega og líkamlega heilsu. Áhersla er lögð á að skapa heimilislegt andrúmsloft á jafningjagrundvelli þar sem boðið er upp á ýmiskonar afþreyingu og fræðslu.

Heitur matur í hádeginu gegn vægu gjaldi.

Klúbburinn Strókur hefur það að markmiði að styðja við bataferli notenda heilbrigðiskerfisins og að fólk með geðræn vandamál fái úrræði við sitt hæfi.

Einnig er markmið Stróks að auka tengsl fólks sem glímir við geðraskanir og/eða félagslega einangrun.

Skrifstofa Laufs þjónustar félagsmenn, fagfólk og almenning sem þarfnast upplýsinga, ráðgjafar, fræðslu og stuðnings. 

Starfræktir eru sjálfshjálpar- og stuðningshópar fyrir fullorðna með flogaveiki, fyrir aðstandendur og fyrir ungt fólk með flogaveiki. Einnig er farið með fræðsluerindi í skóla, leikskóla, sambýli, hjúkrunarheimili og aðra staði þar sem starfsfólk kemur að þjónustu við flogaveika. 

Félagsstarf Gerðubergs:  Opið félagsrými er í húsinu með fjölbreyttri aðstöðu sem nýtist vel fyrir ýmiskonar hreyfingu, félagsstarf, fundi og ýmsa viðburði. 

Klúbburinn Geysir er atvinnumiðað endurhæfingarúrræði fyrir fólk með geðraskanir.

Grundvallarmarkmið klúbbsins er að virkja félaga hans til starfa og koma þeim út í meiri samfélagsvirkni. Allir sem eiga eða hafa átt við geðræn veikindi að stríða geta orðið félagar í Klúbbnum Geysi. 

Geðræktarmiðstöðin hefur verið starfrækt á Selfossi síðan 2015. Batasetrið er opið öllum þeim sem vilja brjótast út úr félagslegri einangrun og bæta líðan og auka lífsgæði sín og koma notendur allstaðar að af Suðurlandi.

Píeta samtökin sinna forvarnarstarfi gegn sjálfsvígum og sjálfsskaða og styðja einnig við aðstandendur. Meðferð þeirra er mótuð af samúð og virðingu fyrir hverjum þeim sem til þeirra leita og áhersla lögð á lausnir og uppbyggingu.

Gefinn er kostur á allt að 15 viðtölum, en þörfin er metin í hverju tilviki fyrir sig. Þegar við á er fjölskyldu og/eða nánustu aðstandendum boðið að taka þátt í meðferðinni, með það að markmiði að styrkja stuðningsnet einstaklingsins. Gefinn er kostur á allt að 5 viðtölum fyrir aðstandendur.

Aðstandendur sem hafa misst eða eiga ástvin í vanda geta sótt sérstaka stuðningshópa og fengið ráðgjöf.

Starfsemi Grófarinnar er byggð á hugmyndafræði valdeflingar, batanálgunar og jafningjasamskipta og er markmið Grófarinnar m.a. að skapa tækifæri fyrir þá sem glíma við geðraskanir til að vinna í sínum bata, þar sem hver og einn tekur ábyrgð á sjálfum sér. 

Laut er athvarf á Akureyri fyrir fólk með geðraskanir. Markmið Lautar er að rjúfa félagslega einangrun og auka lifsgæði fólks.

Í Laut er boðið uppá heitan mat í hádeginu fyrir 600 kr. Þá er boðið upp á hreyfingu, gönguferðir á hverjum degi, sundleikfimi einu sinni i viku og sund. 

Félagasamtökin Hugarafl eru samtök fólks með geðraskanir og er notendastýrð starfsendurhæfing.

Hugarafl býður upp á opið aðgengi fyrir einstaklinga alla virka daga þar sem boðið er upp á reglulega viðveru og stuðning í daglegu lífi, námskeið og virknistarf og er öll þjónusta Hugarafls notendum að kostnaðarlausu. 

Þjónustumiðstöð fyrir syrgjendur og aðstandendur. Markmið Sorgarmiðstöðvar er að styðja við syrgjendur og alla þá sem vinna að velferð þeirra.

Starfsemin lýtur fyrst og fremst að stuðningi, ráðgjöf, upplýsingaþjónustu og fræðslu. Sorgarmiðstöð er öllum opin

Stígamót bjóða upp á viðtöl og sjálfshjálparhópa fyrir konur og karla sem beitt hafa verið kynferðisofbeldi. Aðstandendur eru einnig velkomnir. 

Getum við bætt efni síðunnar?

Hafa samband